شو صار؟
شو صار؟
ـ1ـ
شُو صَارْ.. تَا انْبَحّْ صَوْت الرَّعْدْ
الْـ كانْ يِهْدُرْ بِالشِّتِي
وِيْقَلِّقْ عْيُون الْبَشَرْ؟!
ـ2ـ
شُو صَارْ..
تَا غَابِتْ عَن الأَرْض الشَّمسْ
هَللِّي حَاكُوهَا بِالصّلاة الأَقْدَمِينْ
وْرَسْمُوا صُوَرْهَا فَوْق عِينَيْهُنْ؟!
ـ3ـ
شُو صَارْ.. تَا سَمْع اللَّيَالِي خَفّ،
وْمَا عَادْ يِحْضُنْ وَشْوَشَات الْعَاشْقِينْ
وِيْدَارِيَا،
وِيْقُولْ: يَا أَهْلاَ فِيَا؟!
ـ4ـ
شُو صَارْ؟!..
وْتَمْتَمْ طفل كَمْشِةْ حَكِي:
مَات الْهَنَا بْلَيْل الدَّمَارْ
وِتْطَلَّعْ بْوِجِّي.. وْبِكِي.
**
نامي تا غنيلك
ـ1ـ
نَامِي عَ إِيدَيِّي
تَا غَنِّيلِكْ وْأَنَا سَاكِتْ..
حْدُودْ صَوْتِي ضَيّقَه:
حُنجرَه
وِلْسَانْ..
ـ2ـ
نَامِي..
وْغَمّضِي عْيُونِكْ عَ حُلْم كْبِيرْ
وِاخْتِصْرِي الدِّنِي بْغَفْوِه
وْخَلِّي النَّعَسْ
يْحَيِّكْ الأَحْلامْ بِالإِبْرِه
يِبْنِي قْصُورْ
يْزَيِّنَا بْضَو الْبَرقْ
وْيِنقْلِكْ عَ سَمَا بْعِيدِه
بُعد الصَّحُو وِالنَّوْمْ!!
ـ3ـ
مْخَدِّة وَردْ..
وِفْرَاشْ مَغْزُول بْعَبِيرْ
وْإِنْتِي وْأَنَا وِاللَّيْلْ
نَامِي..
وِاتْركِي شَعْرِك يْشَتِّي عَ وِجِّي نْعُومِيِّه
شَعْرِكْ غَيْمْ أَشْقَرْ!!
**
إنتي الدّني
ـ1ـ
لا تركضِي..
بْخَافْ إِنِّكْ تُوقَعِي
وْيِتْخَرْبَط مْسِيرْ الأَرْضْ
الأَرْضْ..
مْعَلّقَه بِزْرَارْ فسْتَانِك!!
ـ2ـ
لا تضحَكِي..
بْخَافْ مِنْ كِتر الضِّحكْ
يِتْخَزّقُوا تْيَاب الْقَمَرْ
تْيَاب الْقَمرْ..
مَنْشُورَه عَ شْفَافِكْ!!
ـ3ـ
إِنْتِي الدِّنِي..
وْشُو مْفَكّرَه يِعْنِي الدِّنِي
بَحر وْسَمَا وْنِتْفِة تْرَابْ؟!
لأْ..
لأْ..
ضِحْكِة شْفَافْ،
رَفِّة جفنْ،
شْوَيِّةْ دَلَعْ.. هَيْدِي الدِّنِي!!
**
ـ1ـ
شُو صَارْ.. تَا انْبَحّْ صَوْت الرَّعْدْ
الْـ كانْ يِهْدُرْ بِالشِّتِي
وِيْقَلِّقْ عْيُون الْبَشَرْ؟!
ـ2ـ
شُو صَارْ..
تَا غَابِتْ عَن الأَرْض الشَّمسْ
هَللِّي حَاكُوهَا بِالصّلاة الأَقْدَمِينْ
وْرَسْمُوا صُوَرْهَا فَوْق عِينَيْهُنْ؟!
ـ3ـ
شُو صَارْ.. تَا سَمْع اللَّيَالِي خَفّ،
وْمَا عَادْ يِحْضُنْ وَشْوَشَات الْعَاشْقِينْ
وِيْدَارِيَا،
وِيْقُولْ: يَا أَهْلاَ فِيَا؟!
ـ4ـ
شُو صَارْ؟!..
وْتَمْتَمْ طفل كَمْشِةْ حَكِي:
مَات الْهَنَا بْلَيْل الدَّمَارْ
وِتْطَلَّعْ بْوِجِّي.. وْبِكِي.
**
نامي تا غنيلك
ـ1ـ
نَامِي عَ إِيدَيِّي
تَا غَنِّيلِكْ وْأَنَا سَاكِتْ..
حْدُودْ صَوْتِي ضَيّقَه:
حُنجرَه
وِلْسَانْ..
ـ2ـ
نَامِي..
وْغَمّضِي عْيُونِكْ عَ حُلْم كْبِيرْ
وِاخْتِصْرِي الدِّنِي بْغَفْوِه
وْخَلِّي النَّعَسْ
يْحَيِّكْ الأَحْلامْ بِالإِبْرِه
يِبْنِي قْصُورْ
يْزَيِّنَا بْضَو الْبَرقْ
وْيِنقْلِكْ عَ سَمَا بْعِيدِه
بُعد الصَّحُو وِالنَّوْمْ!!
ـ3ـ
مْخَدِّة وَردْ..
وِفْرَاشْ مَغْزُول بْعَبِيرْ
وْإِنْتِي وْأَنَا وِاللَّيْلْ
نَامِي..
وِاتْركِي شَعْرِك يْشَتِّي عَ وِجِّي نْعُومِيِّه
شَعْرِكْ غَيْمْ أَشْقَرْ!!
**
إنتي الدّني
ـ1ـ
لا تركضِي..
بْخَافْ إِنِّكْ تُوقَعِي
وْيِتْخَرْبَط مْسِيرْ الأَرْضْ
الأَرْضْ..
مْعَلّقَه بِزْرَارْ فسْتَانِك!!
ـ2ـ
لا تضحَكِي..
بْخَافْ مِنْ كِتر الضِّحكْ
يِتْخَزّقُوا تْيَاب الْقَمَرْ
تْيَاب الْقَمرْ..
مَنْشُورَه عَ شْفَافِكْ!!
ـ3ـ
إِنْتِي الدِّنِي..
وْشُو مْفَكّرَه يِعْنِي الدِّنِي
بَحر وْسَمَا وْنِتْفِة تْرَابْ؟!
لأْ..
لأْ..
ضِحْكِة شْفَافْ،
رَفِّة جفنْ،
شْوَيِّةْ دَلَعْ.. هَيْدِي الدِّنِي!!
**
