غيمه

لو فيّي إغزلْ منْ شَعْرِكْ

غَيْمِه

وْطَيِّرْها بالرّيحْ

لوّنها بْصَابيع الْحُمْرَه

الـ عَمْ تِتْرَقْوَصْ فَوْق شْفافِكْ

بَرْكي بِتْشَتّي أفراحْ

ـ2ـ

كِنتي الفَرْحَه

الـ عَمْ إِنْطِرْها

وإبْنيلا قْصُور مْضُوّايِه

إحْبِسْها بْقلبي..

تا قلبي

يْخَفّفْ دَقَّاتُو.. وْيِرْتاحْ

ـ3ـ

شِفْتِكْ جِنِّيِّه مَسْحُورَه

بْقَنينِه 

وِالْبَحْر مْرايِه

مَوْجاتُو بِلَون عْيُونِكْ

وْمِتل الـ عَمْ بِيقلّي

فْتَحْها

خَلّصها.. 

الْبَوسِه مِفْتاحْ

ـ4ـ

..وْبِسْت الْقَنينِه تا صارْ

وِجّكْ عم بينَقِّطْ نارْ

وْفَجْأَه..

 مِتل الْكِذْبِه جايي

حورِيّه 

مِنْ قَلبْ حْكايه

عَ راسا إكْليل الْغارْ

وْعَ خْدُودا زَهْر التّفّاحْ

**