ـ1ـ
نَامِي عَ إِيدَيِّي
تَا غَنِّيلِكْ وْأَنَا سَاكِتْ..
حْدُودْ صَوْتِي ضَيّقَه:
حُنجرَه
وِلْسَانْ..
ـ2ـ
نَامِي..
وْغَمّضِي عْيُونِكْ عَ حُلْم كْبِيرْ
وِاخْتِصْرِي الدِّنِي بْغَفْوِه
وْخَلِّي النَّعَسْ
يْحَيِّكْ الأَحْلامْ بِالإِبْرِه
يِبْنِي قْصُورْ
يْزَيِّنَا بْضَو الْبَرقْ
وْيِنقْلِكْ عَ سَمَا بْعِيدِه
بُعد الصَّحُو وِالنَّوْمْ!!
ـ3ـ
مْخَدِّة وَردْ..
وِفْرَاشْ مَغْزُول بْعَبِيرْ
وْإِنْتِي وْأَنَا وِاللَّيْلْ
نَامِي..
وِاتْركِي شَعْرِك يْشَتِّي عَ وِجِّي نْعُومِيِّه
شَعْرِكْ غَيْمْ أَشْقَرْ!!
**
