ـ1ـ
لا تركضِي..
بْخَافْ إِنِّكْ تُوقَعِي
وْيِتْخَرْبَط مْسِيرْ الأَرْضْ
الأَرْضْ..
مْعَلّقَه بِزْرَارْ فسْتَانِك!!
ـ2ـ
لا تضحَكِي..
بْخَافْ مِنْ كِتر الضِّحكْ
يِتْخَزّقُوا تْيَاب الْقَمَرْ
تْيَاب الْقَمرْ..
مَنْشُورَه عَ شْفَافِكْ!!
ـ3ـ
إِنْتِي الدِّنِي..
وْشُو مْفَكّرَه يِعْنِي الدِّنِي
بَحر وْسَمَا وْنِتْفِة تْرَابْ؟!
لأْ..
لأْ..
ضِحْكِة شْفَافْ،
رَفِّة جفنْ،
شْوَيِّةْ دَلَعْ.. هَيْدِي الدِّنِي!!
**
